सावधान ‘हुडहुड’ येतोय !

October 10, 2014 4:59 PM0 commentsViews:

huhhud cyclone

 10 ऑक्टोबर :  हुडहुड हे चक्रीवादळ अंदमानपासून पुढे सरकले आहे आणि आता हे चक्रीवादळ ओडिशा आणि आंध्र प्रदेशच्या उत्तर किनारपट्टीच्या दिशेने वेगाने पुढे येत आहे. यामुळे 160 प्रतिकिमी वेगाने वारे वाहण्याची शक्यता आहे. आंध्रच्या नऊ जिल्ह्यांमध्ये, तर ओडिशाच्या सोळा जिल्ह्यांमध्ये हाय अलर्ट जारी करण्यात आली आहे. याआधी 12 ऑक्टोबर 2013 ला आलेल्या पाइलीन या वादळाने मोठे नुकसान केले होते, त्यामुळे लोकांमध्ये भितीचे वातावरण पसरले आहे. येत्या 24 तासांत हे वादळ अधिक आक्रमक होऊ शकतं असा इशारा हवामान खात्यानं दिलाय. हे वादळ विशाखापट्टणमच्या किनारपट्टीवर रविवारी दुपारी धडकण्याची शक्यता आहे.

अंदमान, ओडिशा व आंध्र या तीन राज्यांवर याचा अधिक परिणाम होण्याची शक्यता वर्तवली जातेय. चक्रीवादळामुळे निर्माण होणार्‍या परिस्थितीला तोंड देण्यासाठी ओडिशा सरकारने पूर्ण तयारी केली आहे, असा दावा ओडिशा सरकारने केलाय. त्याचबरोबर बंगाल व बिहारचे एनडीआरएफ पथकही या वादळाचा सामना करण्यासाठी सज्ज झालं आहे. मात्र या वादळामुळे नागरिकांमध्ये भितीचे वातावरण आहे.

+++++++++++++++++++++++++++++++++++++++++++++++++++++++++++++++++++++++++++++++++++++

बातम्यांच्या अपडेटसाठी कनेक्ट राहा आमच्या फेसबुक पेज आणि टिवट्‌र अकाऊंटसोबत

Follow @ibnlokmattv

+++++++++++++++++++++++++++++++++++++++++++++++++++++++++++++++++++++++++++++++++++++

close