आबा अनंतात विलीन

February 17, 2015 3:19 PM1 commentViews:

RR_Patil_pass away456317 फेब्रुवारी : महाराष्ट्राचे लाडके आबा…आर.आर.पाटील यांना शोकाकुल वातावरणात अखेरचा निरोप देण्यात आला. आबांच्या
पार्थिवावर त्यांच्या जन्मभूमी अंजनीमध्ये शासकीय इतमामात अंत्यसंस्कार करण्यात आले. आबांच्या तिन्ही मुलांनी पार्थिवाला अग्नी दिला. पोलिसांनी बंदुकीच्या फैर्‍या झाडून आबांना अखेरची सलामी दिली. ‘अमर रहे अमर रहे’ आर.आर.पाटील अमर रहे’ च्या घोषणांनी हेलिपॅड मैदान भावपूर्ण झालं. राजकीय नेते, लाखो गावकरी आणि अवघ्या महाराष्ट्राने आज या आपल्या लाडक्या आबांना साश्रू नयनाने अखेरचा निरोप दिला. आबांच्या अखेरच्या इच्छेनुसार दहावा, तेरावा हा कार्यक्रम होणार नाही. त्यामुळे 19 तारखेला अस्थीविसर्जनाचा कार्यक्रम अंजनीगावात ज्या ठिकाणी अंत्यसंस्कार झाले तिथेत अस्थीविसर्जनाचा कार्यक्रम होणार आहे.

साधी राहणी, स्वच्छ प्रतिमा, सोज्ज्वळ नेता आणि प्रखर वक्ता अशी ओळख असलेल्या आबांचं सोमवारी तोंडाच्या कर्करोगामुळे अकाली निधन झालं. आबांच्या अकाली एक्झीटमुळे महाराष्ट्र पोरका झाला. गेल्या तीन महिन्यांपासून त्यांच्यावर उपचार सुरू होते. मात्र, सोमवारी लीलावती हॉस्पिटलमध्ये उपचारादरम्यान प्राणज्योत मालवली. सोमवारी संध्याकाळी राष्ट्रवादीभवनात अंत्यदर्शनानंतर आबांचं पार्थिव सकाळी सात वाजता त्यांच्या मुळ गावी अंजनीत दाखल झालं. आबांचं पार्थिव पोहचताच गावकर्‍यांच्या अश्रूंचा बांध फुटला. ज्या आबांना लहानाचं मोठं होताना पाहिलं, त्यांचा जीवनसंघर्षाला जवळून ज्यांनी अनुभवला अशा त्यांच्या सहकारी, कार्यकर्त्यांचे डोळे अश्रूंनी डबडबले.

भिलवाडी नाक्यापासून ते अंजनी गावातील हेलिपॅड मैदानापर्यंत आबांची अंत्ययात्रा निघाली. या अंत्ययात्रेत आबांच्या समर्थकांची अलोट गर्दी लोटली होती. आपल्या या लाडक्या नेत्याला,सहकार्‍याला अखेरचा निरोप देण्यासाठी सर्वपक्षीय नेतेही उपस्थित होते. राष्ट्रवादीचे अध्यक्ष शरद पवार, अजित पवार, दिलीप वळसे पाटील, जयंत पाटील, पतंगराव कदम, बाळासाहेब थोरात, हर्षवर्धन पाटील, राधाकृष्ण विखे पाटील, हसन मुश्रीफ, संजयकाका पाटील, नारायण राणे, पृथ्वीराज चव्हाण, चंद्रकांत पाटील, माणिकराव ठाकरे, भास्कर जाधव, पद्मसिंह पाटील आणि अण्णा हजारेही उपस्थित होते. आबांनी महाराष्ट्रात अनेक जिल्ह्यात जावून त्यांनी कार्यकर्त्यांची फळी उभारली. सामान्य लोकांसाठी आबांनी आपलं आयुष्य वाहून दिलं, जो रस्ता त्यांनी निवडला होता, त्या रस्त्यानं मार्गक्रमण करणं हीच आबांना खरी श्रध्दांजली असेल अशी भावना यावेळी शरद पवारांनी व्यक्त केली.

++++++++++++++++++++++++++++++++++++++++++++++++++++++++++++++++++++++++++++++++++++

बातम्यांच्या अपडेटसाठी कनेक्ट राहा आमच्या फेसबुक पेज आणि टिवट्‌र अकाऊंटसोबत

Follow @ibnlokmattv

+++++++++++++++++++++++++++++++++++++++++++++++++++++++++++++++++++++++++++++++++++++

  • Ravi Kesarkar

    सार्वजनिक जीवनात राहून साधेपणा, स्वच्छ प्रतिमा व खेड्या-पाड्या तल्या सर्वसामान्य जनतेशी असलेली नाळ आबांनी नेहमीच जपली. अत्यंत सामान्य कुटुंबात जन्म घेऊन स्वत:च्या कर्तृत्वावर राजकारणात उत्तुंग भरारी घेतली व तब्बल दोन दशके सत्तेच्या परिघात राहूनही कधीही भ्रष्टाचाराचा साधा शिंतोडाही स्वत:च्या चारित्र्यावर उडू न देणारा हा अंजनी चा सुपुत्र आज अनंतात विलीन झाला … देव त्यांच्या आत्म्यास शांती प्रधान करो !!

close