मुंबई हल्ल्यात हेडलीची मुख्य भूमिका असल्याचा संशय

November 13, 2009 2:06 PM0 commentsViews: 5

13 नोव्हेंबरअमेरिकेत अटक झालेल्या डेव्हिड हेडलीचे लष्कर-ए-तोयबा या अतिरेकी संघटनेशी संबंध असल्याचं आढळून आलंय. 26 नोव्हेंबरला झालेल्या मुंबईवरील हल्ल्यापूर्वी हेडली अनेकदा भारतात येऊन गेल्याचं उघड झालंय. डेव्हिड हेडलीच्या पासपोर्टचा तपशील IBN नेटवर्ककडं उपलब्ध झालाय. त्यानुसार हेडलीने भारताला 9 वेळा भेट दिली होती. दिल्ली आणि मुंबईत तो अनेकदा राहिलाही होता. त्याशिवाय अतिरेकी हल्ल्याचं टार्गेट शोधण्यासाठी त्यानं इतर 5 शहरांनाही भेट दिली. मुंबई हल्ल्यानंतर यावर्षीच्या मार्चमध्ये हेडलीने दिल्लीला भेट दिली. पहाडगंज भागातल्या हॉटेल आनंद आणि हॉटेल डी हॉलिडे इंटरनॅशनलमध्ये त्याचा मुक्काम होता. मुंबई हल्ल्याशी संबंधित अनेक ठिकाणांना हेडलीनं भेट दिली होती. हेडलीच्या इमिग्रेशन डिटेल्समध्ये ट्रायडन्ट हॉटेलचा उल्लेख आहे. ताज हॉटेलमध्येही त्याने एक रुम बुक केली होती, असं समजतं. त्यानेच या हॉटेल विषयीची माहिती अजमल कसाबला दिल्याचं सूत्रांनी सांगितलंय. सीएसटी जवळच्या एका गेस्ट हाऊसमध्ये हेडली राहिला होता. त्या गेस्ट हाऊसच्या मॅनेजरची सध्या चौकशी सुरू आहे.हेडली संदर्भात सध्या कोणतीही सविस्तर माहिती आपल्याकडे नसल्याचं राज्याचे मुख्यमंत्री अशोक चव्हाण यांनी म्हटलं आहे. पण तो मुंबई आणि भारतात वास्तव्याला होता अशी माहिती आहे. हेडली सध्या एफबीआयच्या कोठडीत आहे आणि या केसचा एनआयए तपास करत असल्याचंही चव्हाण यांनी म्हटलंय. भारत सरकार हेडलीला ताब्यात घेण्याचे प्रयत्न करत असल्याचीही माहिती आहे. नॅशनल इनव्हेस्टिगेशन एजन्सीतल्या सूत्रांनी दिलेल्या माहितीनुसार, ते लवकरच हेडलीची चौकशी करणार आहेत. एफबीआयने हेडलीला गेल्या महिन्यात शिकागो विमानतळावर अटक केली होती. हेडलीचं बॉलिवूड कनेक्शनअमेरिकेतला दहशतवादी डेव्हिड हॅडलीचे दिग्दर्शक महेश भटचा मुलगा राहुल भटशी संबंध असल्याची माहितीही पुढे येत आहे. एफबीआयच्या चौकशीत ही माहिती पुढे आली. याप्रकरणी पोलिसांनी राहुल भटची चौकशी केल्याचं समजतं. महेश भटनीही राहुलची चौकशी झाल्याचं मान्य केलंय. हेडली मुंबईत असताना राहुल हेडलीच्या संपर्कात होता. पण त्यावेळी राहुलला हेडलीचा दहशतवाद्यांशी कारवायांबद्धल माहिती नव्हती असं समजतं.

close