ज्येष्ठ कम्युनिस्ट नेते ज्योती बसू यांचं निधन

January 17, 2010 11:31 AM0 commentsViews: 20

17 जानेवारीज्येष्ठ कम्युनिस्ट नेते आणि पश्चिम बंगालचे माजी मुख्यमंत्री ज्योती बसू यांचं रविवारी सकाळी निधन झालं. कोलकातातल्या एएमआरआय हॉस्पिटलमध्ये त्यांचं निधन झालं. त्यांचं पार्थिव सीपीएमच्या मुख्यालयात अंत्यदर्शनासाठी ठेवलं जाणार आहे. त्यांच्या अंतिम इच्छेनुसार त्यांचं देहदान होणार आहे. त्यांच्या पार्थिवाचं दर्शन घेण्यासाठी कोलकात्यात लोकांचा रस्त्यावर महासागर लोटलाय. पश्चिम बंगाल सरकारनं त्यांच्या निधनानिमित्त सोमवारी सुट्टी जाहीर केली आहे. तर बिहार सरकारनं तीन दिवसांचा दुखवटा जाहीर केला. ज्योती बसू यांच्या कारकिर्दीवर एक नजरज्योती बसू… भारतीय राजकारणात सगळ्यात जास्त काळ सक्रिय राहिलेले नेते. उमदं व्यक्तिमत्त्व, उत्कृष्ट संसदपटू अशी त्यांची ओळख. वयाच्या विसाव्या वर्षी ज्योती बसू लंडनमध्ये कायद्याचं शिक्षण घेण्यासाठी गेले. तिथेच ते कम्युनिस्ट चळवळीच्या संपर्कात आले. आणि परतल्यानंतर डाव्या चळवळीत सक्रियपणे सहभागी झाले. ज्योती बसू पहिल्यांदा 1946 साली बंगालमध्ये आमदार झाले. कम्युनिस्ट पार्टी ऑफ इंडियामध्ये 1964 साली फुट पडली त्यानंतर कम्युनिस्ट पार्टी ऑफ इंडिया मार्क्सिस्टचे ते सगळ्यात प्रभावी नेते म्हणून पुढे आले. त्यानंतर त्यांनी 1967 आणि 1969 साली पश्चिम बंगालचे उपमुख्यमंत्री म्हणून काम पाहीलं. आपली कारकिर्द गाजवणारे बसू 1977 साली पश्चिम बंगालच्या मुख्यमंत्रीपदी विराजमान झाले. आणि 23 वर्ष त्यांनी मुख्यमंत्रीपदाची धुरा प्रभावीपणे सांभाळली. ज्योती बसू यांनी पश्चिम बंगालमधलं अशांत वातावरण आपल्या काळात शांत केलं. त्यांनी सतत पुरोगामी विचारांचा पुरस्कार केला. बसू स्वत: एक सामाजिक कार्यकर्ते म्हणून ओळखले जायचे. 1997 साली बसूंना पंतप्रधानपदाची संधी आली होती. पण पक्षाच्या पॉलीट ब्युरोनं सरकारमध्ये सहभागी न होण्याचा निर्णय घेतल्याने त्यांची ही संधी हुकली. पक्षाच्या या निर्णयावर बसू यांनी तीव्र शब्दात संताप व्यक्त केला होता. या जेष्ठ नेत्याने नोव्हेंबर 2000 साली बंगालचं मुख्यमंत्रीपद सोडलं. त्यानंतरही त्यांनी पक्षाचं काम अविरतपणे सुरुच ठेवलं होतं. साम्यवाद आणि राजकारण यांची उत्तम सांगड घालण्यासाठी ज्योती बसू कायम स्मरणात राहतील.

close