बिगर सभासदांनाही योग्य ऊस भाव देण्याचे आदेश

August 28, 2010 11:50 AM0 commentsViews: 31

28 ऑगस्ट

साखर कारखान्यांनी सभासद शेतकर्‍यांप्रमाणेच बिगर सभासद शेतकर्‍यांना उसाचा भाव द्यावा आणि त्यांची 1994 पासूनची फरकाची थकबाकी द्यावी, असा महत्वपूर्ण निकाल मुंबई हाय कोर्टाच्या औरंगाबाद खंडपीठाने दिला आहे. त्यामुळे बिगर सभासद शेतकर्‍यांची पिळवणूक करणार्‍या सहकारी साखर कारखानदारांना यापुढे सर्वांना समान मोबदला द्यावा लागणार आहे.

नळेगाव येथील जय जवान जय किसान या सहकारी साखर कारखान्याला अंबाजोगाई तालुक्यातील देवळा व अंजनपूर या तालुक्यातील शेतकर्‍यांनी 1994 मध्ये ऊस दिला होता. त्यावेळी या कारखान्याने सभासद शेतकर्‍यांना प्रतिटन 665 रूपये भाव दिला.

पण देवळा व अंजनपूर येथील शेतकरी जय जवान जय किसानचे सभासद नसल्याने त्यांना पहिल्या टप्प्यात 460 आणि दुसर्‍या टप्प्यात 160 रूपये दिले. त्यांना सभासद शेतकर्‍यांपेक्षा 55 रूपये कमी भाव दिल्याने या शेतकर्‍यांनी हायकोर्टात धाव घेतली होती.

त्यांच्या अर्जावर कोर्टाने या सर्व शेतकर्‍यांना त्यांच्या फरकाची 1994 पासूनची थकबाकी द्यावी असा आदेश तर दिलाच, पण साखर कारखान्यांनी सभासद व बिगर सभासद असा भेदभाव करू नये, असेही या निकालात म्हटले.

त्यामुळे या निकालाच्या आधारे इतर शेतकरीही थकबाकीसाठी पात्र ठरतातच, शिवाय यापुढील काळात हा आदेश राज्यातील सर्वच कारखान्यांना लागू होणार असल्याने ऊस उत्पादक शेतकर्‍यांना समान भाव मिळणार आहे.

close