कल्याण डोंबिवली निवडणूक युतीसाठी अवघड

September 28, 2010 11:26 AM0 commentsViews: 3

आशिष जाधव, विनोद तळेकर, मुंबइ

28 सप्टेंबर

कल्याण डोंबिवली महानगरपालिकेच्या निवडणुकीची रणधुमाळी आता सुरू झाली आहे. शिवसेना भाजपने जागावाटप जाहीर करून आघाडी घेतली आहे.

पण यंदा युतीसाठी ही निवडणूक सोपी नसेल. कारण त्यांना आता काँग्रेस आघाडीसह तगडे आव्हान असेल, ते मनसेचे.

कल्याण डोंबिवलीच्या 107 जागांसाठीची महापालिका निवडणूक म्हणजे मुंबई महापालिकेच्या निवडणुकांची रंगीत तालीम मानली जात आहे.

सगळ्या पक्षांनीही ही निवडणूक अतिशय गांभिर्याने घेतली आहे. पण या निवडणुकीत खरी लढत असेल, ती सत्ताधारी शिवसेना आणि मनसेमध्ये. त्यादृष्टीने दोन्ही पक्षांनी तयारी सुरू केली आहे.

सध्या कल्याण डोंबिवली महपालिकेत शिवसेनेचे 32 नगरसेवक आहेत. भाजपच्या 17, तर एका रिपाईच्या आणि काही अपक्षांच्या मदतीने सध्या शिवसेना इथे सत्तेवर आहे.

काँग्रेस आणि राष्ट्रवादीचे मावळत्या महापालिकेत प्रत्येकी 21 नगरसेवक आहेत. तर अपक्ष नगरसेवकांची संख्या 14 आहे. सध्या इथे 4 पेकी 2 आमदार मनसेचे एक भाजपचा आणि एक अपक्ष आमदार आहे.

पण शिवसेनेची पाटी मात्र कोरीच आहे. त्यामुळे सत्ताधारी असूनही शिवसेनेसमारचे आव्हान खडतर आहे.

विधानसभा निवडणुकीत उमेदवारांना मिळालेल्या मतांच्या आधारावरून काढलेल्या आकडेवारीनुसार जरी शिवसेना 42 महापालिका वॉर्डात पहिल्या नंबरवर असली तरी मनसेही कमी अधिक फरकाने त्यांच्या मागे आहे.

तसेच शहरी तरूण वर्गात सध्या मनसेची लोकप्रियता वाढत असल्याने या वर्गासाठीही शिवसेनेला वेगळी रणनीती आखावी लागेल.

नुकत्याच झालेल्या विधानसभेच्या आकडेवारीनुसार मनसेलाही या भागात तब्बल 31 जागांवर पहिल्या क्रमांकाची मते मिळाली आहेत.

मनसे फॅक्टर तसेच आगरी आणि मालवणी मते विचारात घेऊन काँग्रेस राष्ट्रवादी आघाडीने सध्या नारायण राणे आणि गणेश नाईक यांच्याकडे निवडणुकीची कमान सोपवली आहे.

close