डेंचे मारेकरी अटकेत; हत्येचे गूढ कायम

June 27, 2011 4:14 PM0 commentsViews: 9

27 जून

'मिड डे' चे पत्रकार जे.डेंच्या हत्येप्रकरणी मुंबई पोलिसांनी 7 जणांना अटक केली. हत्येमागे छोटा राजन टोळीचा हात असल्याचंही स्पष्ट झालं. मात्र ही हत्या का करण्यात आली याचं गूढ मात्र कायम आहे. हे गूढ उकलण्यात पोलिसांना अजून यश आलं नाही. त्यामुळे हा तपास अर्धवट आहे असं म्हटलं जातं.

एका पत्रकाराच्या हत्येची सुपारी थेट छोटा राजन देतो हे स्पष्ट झाल्याने त्याचे कारणही तेवढचं धक्कादायक असण्याची शक्यता आहे. अटक करण्यात आलेले सर्व आरोपी अट्टल गुन्हेगार असल्याने त्यांच्याकडून माहिती काढायला उशीर लागेल असं पोलीस आयुक्त अरुप पटनायक यांनी स्पष्ट केले.

जे. डे यांची हत्या झाली 11 जून रोजी. पवईसारख्या गजबजलेल्या परिसरात दिवसाढवळ्या बाईकवरुन आलेल्या गुंडांनी केलेल्या या हत्येमुळे मुंबई हादरुन गेली. पण अखेर याप्रकरणातल्या सात आरोपींना मुंबई पोलिसांनी अखेर पकडलं. बाईकवरुन येऊन जे. डे यांची हत्या करुन पसार झालेले हे आरोपी छोटा राजन टोळीचे गुंड असल्याचं उघड झालंय. अंडरवर्ल्डने दिलेल्या सुपारीमध्ये जे डे यांचा बळी गेला.

सहा जून 2011 ला म्हणजे जे. डे यांच्या हत्येच्या फक्त पाच दिवस आधी सतीश काल्या याला छोटा राजनचा कॉल आला. छोटा राजन याने त्याला जे. डेंच्या मोटारसायकलचा क्रमांक आणि जे. डे यांचं वर्णन सांगितलं.

जे. डे म्हणजे ज्यांना गुन्हेगारीच्या भाषेत टार्गेट म्हटलं गेलं. ते हमखास भेटतील अशी दोन ठिकाणही सतीशला फोनवरुन सांगण्यात आली. पवई हिरानंदानी आणि परळची पेनिन्सुला सेंटर आणि मग सतीश काल्याच्या नेतृत्वाखाली अंडरवर्ल्डचे हे ऑपरेशन सुरु झालं.

सात जूनला एक वाजता दुपारी अनिल वाघमोडेनं परळच्या जागेची रेकी केली. आणि आठ जूनला सतीश आणि अनिलने मिळून या जागेची रेकी केली. तिथेच त्यांनी जे. डे यांना पहिल्यांदा बघितले. जे. डे. हे पत्रकार आहेत आणि आपण कुणाला मारतोय याची सतीशला कल्पनाच नव्हती. पेनिन्सुला सेंटरची जागा वर्दळीची होती आणि प्रत्यक्षदशीर्ंचा धोका होता म्हणून रेकीमध्येच ती जागा बाद ठरली.

9 आणि 10 जूनला या हल्लेखोरांनी हिरानंदानी परिसरात वॉच ठेवला होता. पण त्यादिवशी जे. डे त्यांना दिसलेच नाहीत. तर अकरा जूनला त्यांनी सकाळी अकरापासूनच जे. डेंचा पाठलाग सुरु केला. प्रत्यक्षदशीर्ंचा धोका इथं त्यांना कमी वाटला. हे बघून सतिश काल्याने ड्रायव्हरला गाडीचा वेग वाढवायला सांगितला. आणि जे डे यांच्यावर मागून 5 राऊंड फायर केल्या.

हल्ला केल्यानंतर हे सात जण टीममधल्याच एकाच्या म्हणजे मंगेश आगवणे याच्या घरी जोगेश्वरीला रात्री एकत्र जमले. पण मधल्या काळात ज्यावर हल्ला केला ती व्यक्ती पत्रकार असल्याची बातमी टीव्हीवर आली. त्यानंतर गडबडलेल्या या सतीश काल्याने थेट छोटा राजनला कॉल केला. आणि त्याने विचारले की, टार्गेट पत्रकार होतं हे आधी का सांगितलं नाही ? तेव्हा छोटा राजनने त्याला आणखी पैसे देतो, मुंबई सोड, असं सांगितलं आणि सतीश काल्याच्या पहिल्यांदा गुजरातमधील पावागडमध्ये गेले तिथून ते पुन्हा महाराष्ट्रात परतले.

आणि तीर्थक्षेत्राच्या ठिकाणांचा प्रवास सुरू केला. शिर्डी, अक्कलकोट असा प्रवास करत ते कर्नाटकात पोचले. विजापूर आणि बंगळुरूमध्ये त्यांनी मुक्काम केला. त्यानंतर ते तामिळनाडूतल्या मदुराईत पोचले. पोलीस त्यांच्या मागावर होतेच. अखेर तिघांना रामेश्वरममधून अटक करण्यात आली. तर इतर तिघांना मुंबईतून तर एकाला सोलापूरमधून अटक झाली. जे.डे हे युकेला जाऊन आले होते. ते फिलीपिन्सलाही जाणार होते. हे त्यांचा ईमेल आयडीही आता पोलिसांनी क्रॅक केला. त्यामुळे सर्वच शक्यतांचा पोलीस आता तपास करत आहे.

आता छोटा राजनला या प्रकरणात आरोपी केलं जाणार आहे. त्याला फरारी घोषित करण्यात आलंय. मुंबई पोलिसांच्या या सर्व बहादूरीबद्दल मुंबई पोलिसांना राज्य सरकारकडून 10 लाख रुपयांचंं बक्षीस मिळाले आहे.

डेंच्या हत्येचा घटनाक्रम

जे.डे यांच्या हत्येच्या मधल्या दोन दिवसात म्हणजे 9 आणि 10 जूनला सतीश काल्याच्या टीमनं हिरानंदानी भागात वॉच ठेवला पण त्यांना जे.डे भेटले नाहीत. अखेर 11 जूनला सकाळी एका टीमला जे.डे दिसले. आणि मग त्या टीमने इतरांना ही माहिती दिली. मग तिथूनच म्हणजे घाटकोपर आर मॉल सर्कल पासून जे डे यांचा फॉलो अप हल्लेखोरांनी सुरु केला.

त्यानंतर जे डे हिरानंदानी हॉस्पिटलजवळ अंडरग्राऊंड दुकानात गेले. ते झेरॉक्स काढण्यासाठी गेले होते. हल्लेखोरांना त्यांची बाईक आणि हेल्मेट तिथं दिसलं. पण इथं त्यांनी शूटिंग केलं नाही. कारण प्रत्यक्षदशीर्ंची भीती होती.

त्यानंतर जे. डे आयआयटीच्या मेन गेटजवळ कुरिअर कंपनीत गेले. या ठिकाणीही हल्लेखोरांनी शूटिंग केलं नाही. आयविटनेस म्हणजेच प्रत्यक्षदशीर्ंची भीती इथंही होती. मग पुढे जे.डे यांनी क्रिस्टल हाऊस जवळ टर्न घेतला आणि तिथचं स्पेक्ट्रा बिल्डिंग समोर हल्लेखोरांनी नेम साधला.

ही हत्या संपूर्णपणे प्रोफेशनली करण्यात आली. काल्याने शूटरव्यतिरीक्त वॉचर्सची सोय केली. त्यामुळे सर्व धोक्यांपासून ते सावधपणे बचावले. बाईक बंद पडली तर क्वालिस सुद्धा बॅकअपसाठी वापरण्यात आली होती.

गृहमंत्री आर. आर. पाटील आणि मुख्यमंत्री पृथ्वीराज चव्हाण यांनी या प्रकरणात पोलिसांनी केलेल्या तपासाबद्दल पोलिसांचं कौतुक केलं. सतीश काल्या हा या संपूर्ण प्रकरणात सक्रीय होता. बघूया या तिन्ही गुंडांचं गुन्हेगारी रेकॉर्ड..

कोण आहे सतीश काल्या ?

- रोहित थंगप्पन जोसेफ ऊर्फ सतीश काल्या- वय- 34 वर्षं- पत्ता- गोळीबार नगर, खार पूर्व- छोटा राजन गँगचा कुख्यात शूटर – फायरिंग केल्याचे गुन्हे- 1998 – खार वाईन शॉपमध्ये फायरिंगखुनाचा प्रयत्न केल्याचे 3 गुन्हे- 1998 – मोहन मोहिते खून प्रकरण, खार – 2004 – मोहन देवाडिगा खून प्रकरण, खार- 2004 – अशोक शेट्टी खून प्रकरण……………..कोण आहे अनिल वाघमोडे ?

- वय-34- पत्ता – आंबोली, अंधेरी – अनिलवर 3 गुन्हे दाखल – 1993 – खुनाचा गुन्हा दाखल- 1998 – खारच्या वाईन शॉपमध्ये फायरिंग- 1998 – मोहन मोहिते खून प्रकरण, खार – 2004 – मोहन देवाडिगा खून प्रकरण ,खार- तिन्ही गुन्ह्यांत अनिल हा सतीश काल्याचा साथीदार…………….

निलेश शेंडगे

- वय – 34 वर्षंराहणार – सायन- 3 गुन्हे दाखल

अरुण डाके

- राहणार – चेंबूर- खंडणीचे 6 गुन्हे दाखल

सचिन गायकवाड-राहणार – चेंबूर- एक गुन्हा दाखल

अभिजीत शिंदे- वय – 28 वर्षं- राहणार – सायन

मंगेश आगवणे- राहणार – जोगेश्‍वरी

close