अंगावर आले तर शिंगावर घेऊ – उध्दव ठाकरे

June 21, 2012 12:37 PM0 commentsViews: 4

21 जून

टोल नाक्यावर एक दोन दगड मारुन हप्ते वसूल करणार्‍यांनी शिवसेनेच्या नांदी लागू नये अन्यथा अंगावर आला तर शिंगावर घेतल्या शिवाय राहणार नाही असा ठाकरी टोला शिवसेनेचे कार्याध्यक्ष उध्दव ठाकरे यांनी राज ठाकरे यांना लगावला. तसेच काँग्रेसचे नेते अहमद पटेल यांच्याशी हॉटेलमध्ये भेट घेतली पण कोणी भेट घेतली हे जाहीर करावे असं जाहीर आव्हानही उध्दव ठाकरे यांनी दिलं. उध्दव यांनी पत्रकार परिषद घेऊन राज यांना सडेतोड उत्तर दिले.

राष्ट्रपतीपदाच्या निवडणुकीत शिवसेनेनं काँग्रेसचे उमेदवार प्रणव मुखर्जी यांना पाठिंबा दिला. यावर मनसेचे अध्यक्ष राज ठाकरे यांनी काल बुधवारी सडकून टीका केली. काँग्रेसला पाठिंबा देणार हा कसला विरोधी पक्ष ? काँग्रेसचे आणि सेनेचे सेटलमेंट असल्याचा आरोपही राज यांनी केला होता. राज यांच्या आरोपचा समाचार घेत उध्दव ठाकरे यांनी आपल्या स्टाईलने राज यांच्यावर हल्लाबोल केला. टोल नाक्याच्या नावाने आंदोलन करताय. एक दोन दगड फेकल्यामुळे कधी आंदोलन होतं नसतात. मुळात टोलनाका मालकांकडून वसुली करण्याचा धंदा यांनी सुरु केला आहे. काँग्रेसचे नेते अहमद पटेल म्हणे ह्यात हॉटेलमध्ये भेटले. मग पटेल भेटायला आले होते तेंव्हा हे काय पलंगाखाली लपले होते का ? कोण कुठे भेटले यांचे नाव जाहीर करावे उगाच प्रसिध्दीसाठी नाटकं करु नये. यातून फक्त लोकांचं मनोरंजन होते असा खणखणीत टोला उध्दव ठाकरे यांनी लगावला.

तसेच राष्ट्रपतीपदाची निवडणूक यांना काय महापालिकेची निवडणूक वाटली आहे का ? प्रणवदांना पाठिंबा हा व्यक्ती पाहून दिला. पण याचा असा अर्थ नाही ही आमचा काँग्रेसला पाठिंबा आहे असं मुळीच काही नाही. जर दोन महिन्यापुर्वी यांचे नियोजन केले असते तर एनडीएतून सक्षम उमेदवार देता आला असता. पण अशा वेळी देशहित लक्षात घेऊन शिवसेनेनं आपला पाठिंबा दिला. पण राज यांनी पालिकेत पराभव जिव्हारी लागल्यामुळे असले आरोप केले. हे यांच्याच पक्षात नासके आंबे वगैरे म्हणतात मुळात हे आपल्याच पक्षात स्वत:ला सगळ्यात जास्त भिती वाटणारे हे अध्यक्ष आहे असा टोलाही उध्दव यांनी लगावला.

close