मुंबईवरच्या हल्ल्यानंतर पाकला धडा शिकवणं आवश्यक आहे का ?

December 11, 2008 3:35 PM0 commentsViews: 15

मुंबईवरील दहशतवादी हल्ल्यामागे पाकिस्तानच असल्याचं स्पष्ट झालंय. सर्व अतिरेकी पाकिस्तानचे असल्याची माहिती पोलीस तपासात पुढे आली आहे.अतिरेक्यांवर कारवाई करण्यासंदर्भात अमेरिकेकडून दबाव येताच पाकिस्ताननं अतिरेक्यांना अटक केली. पण त्यांना भारताच्या हातात सोपवण्यास नकार दिलाय. मुंबईवरील हल्ल्याच्या घटनेवरुन भारत आणि पाकमधील संबंध ताणले गेले आहेत. युद्धासाठी पाकिस्तान तयार असल्याचं पाकिस्तानचे परराष्ट्र मंत्री शाह मोहम्मद कुरेशींनी सांगितल्यानं त्यात भरच पडली आहे. यावरच होता आजचा सवाल. ' मुंबईवरच्या हल्ल्यानंतर पाकला धडा शिकवणं आवश्यक आहे का ? '. यावर बोलण्यासाठी ज्येष्ठ पत्रकार जतीन देसाई, माजी कॅबिनेट सचिव बी. जी. देशमुख, ज्येष्ठ भाजप विचारवंत तरूण विजय आणि मुंबई विद्यापीठाच्या पॉलिटिकल सायन्स विभागाच्या प्राध्यापिका अरूणा पेंडसे चर्चेत सहभागी झाले होते. भारतात निर्माण झालेलं पाकविरोधी वातावरणाविषयी बोलताना जतीन देसाई म्हणाले, पाकमध्ये भारतविरोधी वातावरण नाही. पण भारतात पाकविरोधी निर्माण केलं जातंय. मुंबईवरील दहशतवादी हल्ल्यानंतर पाकमध्येही निदर्शनं करण्यात आली. दहशतवादाविरोधात जाहीर निवेदनं काढण्यात आली '. जतीन देसाई यांच्या मताशी अरुणा पेंडसे ही सहमत होत्या. 'आपल्याकडे युद्धाची भाषा केली जातेय. युद्धाचा निर्णय कधीही योग्य नाही. असे निर्णय भावनेच्या भरात घेतले जाऊ नये. मंदीचं सावट असताना युद्धाचा विचार दोन्ही देशांना परवडणारा नाही ', असं पेंडसे म्हणाल्या. यासंदर्भात तरूण विजय यांनी सडेतोड मत मांडलं.' पाकिस्तानविरोधातलं हे वातावरण नाही. भारत सुरक्षेसाठी चिंतेत आहे. गेल्या 10 वर्षांत 60 हजार माणसं मारली गेली आहेत. अतिरेक्यांना पाक समर्थन देतंय. आपण कमकवुत असल्यामुळे अमेरिकेचा पाकवर दबाब आणावा लागत आहे ', असं विजय म्हणाले. पाकवर दबाव आणण्यासाठी भारतानं काय केलं पाहिजे ? या आयबीएन- लोकमतचे संपादक निखिल वागळे यांच्या प्रश्नावर माजी कॅबिनेट सचिव बी.एन. देशमुख म्हणाले, पाकवर दबाव आणण्यासाठी भारतानं सामर्थ्यवान बनलं पाहिजं. त्यानंतरच लोक आपलं ऐकतील '. पाकिस्तानला धडा शिकवला पाहिजे, या तरुण विजय यांच्या मतावर जतीन देसाई यांनी आक्षेप घेतला.' ही लोक अप्रत्यक्षरित्या तालिबान आणि दहशतवादी कारवायांना मदत करत आहेत. अतिरेक्यांना भारत- पाक मैत्री नकोय ', असं देसाई म्हणाले.मुंबईवरच्या हल्ल्यानंतर पाकला धडा शिकवणं आवश्यक आहे का ? या पोलमध्ये विचारण्यात आलेल्या प्रश्नावर 93 टक्के लोकांनी ' हो' असं मत नोंदवलं. चर्चेचा शेवट करताना निखिल वागळे म्हणाले की युद्ध कोणालाच नकोय. त्यात निरपराध माणसं मारली जातात. पण दहशतवादी पुन्हा- पुन्हा हल्ले करण्याची हिंमत करतात. त्यामुळे कोणत्याही मार्गानं दहशतवादावर जरब बसवली पाहिजे.

close