S M L

मुंबईत हुडहुडी, महाराष्ट्र गारठला

Samruddha Bhambure | Updated On: Dec 15, 2014 05:29 PM IST

मुंबईत हुडहुडी, महाराष्ट्र गारठला

15 डिसेंबर : एरव्ही घड्याळाच्या काट्यावर धावून, घामेघूम होणार्‍या मुंबईकरांच्या नव्या आठवड्याची सुरुवात थंडीनं कुडकुडत झाली आहे. मुंबईच्या उपनगरांमध्ये काल (रविवारी) पारा 16.8 अंशांवर घसरला होता. त्यामुळे आतापर्यंत कपाटात ठेवलेले स्वेटर्स, शाली आणि मफलर मुंबईकरांनी बाहेर काढले आहेत.

पश्चिमेच्या दिशेने येणारे थंड वारे आणि पूर्वेकडून येणार्‍या बाष्पयुक्त वार्‍यांमुळे तापमान खाली आलं आहे. त्यामुळे राज्यात जागोजागी शेकोट्या पेटलेल्या आहेत. शनिवारी पहाटे झालेल्या अवकाळी पावसानं मुंबईचा पारा खालावला असून ही थंडी आणखी वाढत जाणार असल्याचा अंदाज वेधशाळेनं वर्तवला आहे. त्यामुळे यंदा डिसेंबरमध्येच मुंबईकरांना थंडी अनुभवायला मिळत आहे. उत्तर भारतातही थंडीची लाट पसरली आहे. कालपासून उत्तरेच्या वार्‍यांनी राज्यात पुन्हा प्रवेश केला आहे. परिणामी संपूर्ण राज्यात कडाक्याच्या थंडीची लाट पसरली आहे. त्यामुळे महाराष्ट्राचा पारा आणखी खालावण्याची शक्यता वेधशाळेनं वर्तवली आहे.

मुंबईच्या अनेक उपनगरांनी आज पहाटे धुक्याची चादर लपेटल्याचं सुखद चित्र बघायला मिळालं. अर्थात, पहाटे उठून घराबाहेर पडलेल्या चाकरमान्यांची या कडाक्यानं चांगलीच वाट लावली. कानटोपी, कानपट्टी, जॅकेट, स्वेटर, हातमोजे यापैकी जे-जे आहे ते घालून, स्वत:ला जास्तीत जास्त 'बंदिस्त' करून मुंबईकर बाहेर पडले होते. मॉर्निंग वॉकला जाणारी मंडळीही आज एकदम बंदोबस्तात होती, तर काहींनी या रोजच्या नियमाला फाटाही दिला. काही उत्साही मंडळी या बोचर्‍या थंडीचा अनुभव घेण्यासाठी आवर्जून घराबाहेरही पडली, पण त्यापेक्षा डोक्यावरून पांघरूण घेऊन निद्रादेवीची उपासना करणारेच अधिक होते.

ताज्या तापमानानुसार,

                            कमाल                     किमान

मुंबई-                        29.8                             16.8 अंश सेल्सिअस

पुणे-                           29.3                            18.2 अंश सेल्सिअस

जळगाव-                  26.4                             16.2 अंश सेल्सिअस

कोल्हापूर-                29.7                             19.9 अंश सेल्सिअस

नाशिक-                    26.8                             13     अंश सेल्सिअस

सोलापूर-                   31.2                             17.5 अंश सेल्सिअस

औरंगाबाद-              27.6                             18 अंश सेल्सिअस

नांदेड-                       31                                 16 अंश सेल्सिअस

नागपूर-                    28.2                            17.9 अंश सेल्सिअस

रत्नागिरी-                 31.2                             22.7 अंश सेल्सिअस

Follow @ibnlokmattv

बातम्यांच्या अपडेटसाठी लाईक करा आमच्या फेसबुक पेजला , टि्वटरवर आणि जी प्लस फाॅलो करा

First Published: Dec 15, 2014 10:17 AM IST

पॉपुलर

ताज्या बातम्या

ibnlokmat
close